البنات دول

عارفين البنات دول، البنات اللي هما لا حلوين ولا وحشين، النوعية اللي متشدكش أول ما تشوفها وتتعامل معاها كأنها هوا بس تتحب لما تتعرف بجد عشان جميلة من جواها وجدعة وشخصية كدة!

البنات دول اللي لا هما AUCians ولا مؤهلات متوسطة اللي أهلهم علموهم “كويس” عشان يعرفوا يعيشوا بعدين خلصوا الجامعة واترموا في البحر ومكانش قدامهم غير انهم يعوموا عشان الغرق مش خيار متاح.

البنات دول اللي لا هم بيعرفوا ينموا علي حد ولا لهم في elle و vogue فيبقوا متعلم عليهم من الشلل في الشغل أو أي مجتمع يحاولوا يدخلوه، البنات دول بيفرحوا أن في تقييمهم السنوي بيتقال عليهم انهم شخصيات جديرة بالأحترام والثقة، بس ممكن يكونوا أحق بترقية بيشوفوها بتروح قدامهم عشان هم مش من “الشلة”.

البنات دول بيشيلوا هم كتير وبيضحكوا ويضّحكوا عشان ينسوا ويتعاملوا مع ميراث ملهمش ذنب فيه بس بيشيلوه عشان يريحوا أم مطلقة ضحت عشان تكبر في أحسن حال تقدر عليه، أب أرمل وحيد مش شايف ومعندوش غيرهم، أو حتي فراغ اتساب بفقد المفروض يملوه لوحدهم. بس بيضحكوا عشان هي دي “الحياة”.

البنات دول معندهمش مال كتير ولا جمال يخليهم “عروسة لقطة” بس هم بيبقوا أكتر ناس عندهم استعداد وفهم لفكرة “العيلة” ونفسهم في “العيلة” اللي يعملوها بطريقتهم مش بطريقة حد ولا مجتمع مفروض عليهم، بس محدش بيشوفهم واللي بيشوفهم بيتعامل معاهم علي انهم پورسلين فرز تاني.

البنات دول عارفين انهم بيحبوا وبيحبوا مين وليه، بيحترموا مشاعرهم وبيصرحوا بيها عشان عارفين -شايفين- انها غالية بس مشاعرهم دي عشان واضحة ومتاحة بتترمي في أقرب صفيحة زبالة.

البنات دول بيموتوا بدري، من كل الوجع اللي اتكوّم علي قلوبهم، والناس بيزعلوا عليهم وبيقولوا انهم كانوا جمال وطيبين وملايكة مش بتوع دنيا. وان الطيبين بس هو اللي ربنا بيختارهم…بيتمنوا لو يوم يرجع عشان يحضنوهم أو يطيبوا خاطرهم…بس للأسف بيبقي متأخر.

البنات دول حضن وطبطبة وكلمة طيبة يعيشوهم.

Advertisements
Published in: on August 13, 2014 at 11:01 pm  Comments (4)