مشكلتنا ان احنا بننسي، بننسي بسرعة قوي. مشغولين في دستور اولا لأ ثانيا، الأخوان يع…الليبراليين ييييااااي. نسينا ان من غير الناس اللي راحت وفتحت الطريق مكنناش هنبقي قاعدين وعمالين نتخانق مع بعض دلوقتي علي مين احسن من مين.
نسينا ان علينا واجب مش هقول جميل لازم يترد..لأ ده واجب. غير انه للشهيد اللي ضحي بحياته، لأهله اللي كل يوم بيفتحوا عينهم وميلاقوهوش حواليهم.
عملنلهم ايه، ماديا مطلبوش حاجة مع ان اكترهم حالتهم المادية في منتهي السؤ، المعاشات لسة مبتتصرفش، وفي احيان كتيرة مفيش مصدر دخل.
الرعاية الانسانية: كام واحد رفع سماعة التيلفون اوحتي فكر يروح يزور عيلة شهيد. حد فكر هنعملهم ايه في رمضان لما ييجي عليهم، وهم ناقصين واحد؟ فكرتوا ان العيد جاي وفي اطفال ابهاتم مش هيخدوهم ويخرجوا عشان ببساطة قاموا في يوم من النوم حالفين انهم مش هيناموا الا اما البلد دي تقوملها قومة.
مش هتكلهم علي الرعاية الصحية عشان دي كارثة تانية.
كل ده حاجة، و التأجيل واخلاء سبيل المتهمين والضغط علي اهالي الشهداء عشان يغييروا شهادتهم حاجة تانية خالص. مفيش حاجة حصلت في السر، الأخبار كانت منشورة في الجرايد، الأهالي استغاثت وقالت الحقونا، بيهددونا …اعملوا حاجة عشان دم ولادنا ميروحش هدر.
عملنا ايه؟ عملنا تويت ندوة عشان نتعرف علي تاريخ الحركة النضالية للمدونين، عملنا مؤتمرات اتكلمنا فيها عن انجازات الثورة، روحنا عروض لطيفة اتكلمت علي الثورة…كل ده حلو ومهم ولازم يحصل، بس بعد او علي الأقل بالتوازي مع الوصول لحل لوقف المهزلة دي!!!
اللي انا عايزة اقوله ان احنا كلنا مقصرين ومحتاجين ناخد موقف. اهالي الشهدا اللي غيروا شهادتهم كان غصب عنهم، كانوا مضطرين، واحد مات مش لازم الباقي يحصلوه!!
اهالي الشهدا حاسسين بمرارة رهيبة من التجاهل، حاسسين انهم اتباعوا. ملاقوش مساندة او اي نوع من التضامن لضمان محاكمات عادلة. الناس دي في الأول كانت فخورة بولادها، وكانوا فرحانين وبيقولوا فدي مصر واهلها
بلاش نسيبهم ونضيع بنفسنا فرحتهم وفرحتنا بيهم…لازم نعمل مجموعة من الحقوقيين والمهتمين بالموضوع، ناس تتابع الحالات والقضايا، تحضر المحاكمات وتكتب، وتفضح اي محاولة لتغير الشهادات. لو الحق ده ضاع يبقي الثورة دي بصراحة معملتش حاجة.
روابط:
http://www.almogaz.com/news/144705
http://www.shorouknews.com/contentdata.aspx?id=479350
http://www.elbetelkbeer.com/index.php?option=com_content&view=article&id=10348:——–q14-q&catid=44:2011-04-27-20-28-29&Itemid=67
http://www.egynews.net/wps/portal/news?params=128410
http://www.almogaz.com/news/156542
http://elbadil.net/%D8%AA%D9%87%D8%AF%D9%8A%D8%AF%D8%A7%D8%AA-%D9%88%D9%85%D8%B3%D8%A7%D9%88%D9%85%D8%A7%D8%AA-%D9%84%D8%A3%D9%87%D8%A7%D9%84%D9%8A-%D8%B4%D9%87%D8%AF%D8%A7%D8%A1-%D8%A7%D9%84%D8%A5%D8%B3%D9%83%D9%86/
http://elbadil.net/%d8%a3%d9%87%d8%a7%d9%84%d9%8a-%d8%b4%d9%87%d8%af%d8%a7%d8%a1-%d8%a7%d9%84%d8%ac%d9%8a%d8%b2%d8%a9-%d9%8a%d8%b9%d8%aa%d8%b5%d9%85%d9%88%d9%86-%d8%a3%d9%85%d8%a7%d9%85-%d9%85%d8%a7%d8%b3%d8%a8%d9%8a/